ԲԵԼԳԻԱՅԻ ՎԱՐՉԱՊԵՏԸ ՀՐԱԺԱՐԱԿԱՆԻ ԴԻՄՈՒՄ Է ՆԵՐԿԱՅԱՑՐԵԼ
15-07-2008 15:55:00 | Բելգիա | Միջազգային
ԲՐՅՈՒՍԵԼ, 15 ՀՈՒԼԻՍԻ, ՆՈՅՅԱՆ ՏԱՊԱՆ: Բելգիայի վարչապետ Իվ
Լետերմը հրաժարականի դիմում է ներկայացրել Ալբերտ Երկրորդ
թագավորին` երկրի մարզերին մեծ իշխանությամբ օժտելու եւ երկիրը
իշխանության ճգնաժամից դուրս բերելու նախարարների կաբինետի անհաջող
փորձից հետո: Այս մասին հաղորդում է «Ռոյթերը»` վկայակոչելով
վարչապետի մամլո ծառայությանը:
«Հենց թագավորն է հրաժարականի որոշումն ընդունելու»,-
հայտարարել է Բելգիայի վարչապետի մամլո քարտուղարը` նշելով, որ
հրաժարականը կարող է եւ չընդունվել:
Իվ Լետերմի պահանջի համաձայն, մինչեւ հուլիսի 15-ը
ֆլամանդական կուսակցությունների, որոնք Բելգիայի հյուսիսի իրենց
տարածքների համար ավելի մեծ ինքնավարություն են պահանջում, եւ
ֆրանսախոս կուսակցությունների միջեւ պետք է համաձայնագիր
ստորագրվեր պետական բարեփոխումներ անցկացնելու մասին, որը կարող էր
վերջ դնել իշխանության ճգնաժամին երկրում: Սպասվում էր, որ հուլիսի
15-ին վարչապետը խորհրդարանին կներկայացնի այդ բարեփոխումների
անցկացման ծրագիրը:
Իվ Լետերմը Բելգիայի վարչապետի պաշտոնը զբաղեցրել էր 2008թ.
մարտին ֆլամանդական եւ ֆրանսալեզու կուսակցությունների միջեւ
տասնամսյա դիմակայությունից հետո: