ԵՐԵՎԱՆ, 31 ՀՈՒՆՎԱՐԻ, ՆՈՅՅԱՆ ՏԱՊԱՆ: Այս տարի նախատեսվում է
Երեւան ներկրել միջին տեղատարողությամբ «Բոգդան» մակնիշի 150
ավտոբուսներ եւ 20 տրոլեյբուսներ: Ինչպես «ՆՈՅՅԱՆ ՏԱՊԱՆ»-ի
թղթակցին հայտնեց Երեւանի քաղաքապետարանի Տրանսպորտի վարչության
պետ Աշոտ Սահակյանը, այդպիսով մինչեւ տարեվերջ մայրաքաղաքում
շահագործվող միջին տեղատարողությամբ ավտոբուսների քանակը կհասնի
մոտ 450-ի, իսկ տրոլեյբուսներինը` 65-70-ի:
Ա.Սահակյանի խոսքերով, Երեւանի հասարակական տրանսպորտի ոլորտը
բարելավելու նպատակով նախատեսվում է 2008-2010թթ.-ին
միկրոավտոբուսները փոխարինել ավտոբուսներով եւ ներկայումս
շահգործվող մոտ 3200 միկրոավտոբուսների թիվը առաջիկա երեք
տարիներին կրճատել մինչեւ 1500-ը: Իսկ ավտոբուսային պարկը մինչեւ
2010թ.-ը կհամալրվի 700-800 ավտոբուսներով:
Բացի դրանից, ըստ վարչության պետի, մինչեւ 2011թ.-ը տարեկան
կներկրվի 20-ական տրոլեյբուս: Ըստ այդմ էլ կավելացվի
տրոլեյբուսների երթուղիների թիվը: Ա.Սահակյանը նշեց, որ
տրոլեյբուսների ներկրմանը զուգահեռ կիրականացվի էլեկտրասնուցման
ցանցերի վերանորոգում: Այս տարի նախատեսվում է վերանորոգել Մաշտոց
եւ Գրիգոր Լուսավորիչ փողոցների էլեկտրասնուցման ցանցերը:
Անդրադառնալով ավտոկանգառասրահներին, Ա.Սահակյանը հայտնեց, որ
2006-2007թթ.-ին մայրաքաղաքում ընդհանուր առմամբ տեղադրվել է 210
կանգառասրահ: Պետբյուջեից հատկացված 137 մլն դրամով (մոտ 449 հազար
ԱՄՆ դոլար) այս տարի Երեւանում կտեղադրվի եւս 83 կանգառասրահ, իսկ
2008թ.-ին ամբողջությամբ կավարտվեն կանգառասրահների եւ
կանգառանշանների տեղադրման աշխատանքները:
Ա.Սահակյանը ընդգծեց, որ պետբյուջեից հատկացված 300 մլն
դրամով այս տարի մայրաքաղաքի 27 խաչմերուկներում կտեղադրվեն նոր
լուսացույցեր: Միաժամանակ նշվեց, որ մայրաքաղաքում ավտոմատացված
լուսացուցային նոր համակարգ ներդնելու ուղղությամբ ներկայումս
բանակցություններ են ընթանում Համաշխարհային բանկի (ՀԲ) հետ:
Վարչության պետը նշեց նաեւ, որ Երեւանի մետրոպոլիտենի
զարգացման ծրագրով այս տարի նախատեսվում է պետբյուջեից հատկացված
1,7 մլրդ դրամով վերանորոգել մետրոյի կայարանների
շարժասանդուղքներն ու վագոնները: