ԱՌԱՋԻՆ ԿԻՍԱՄՅԱԿՈՒՄ ԵՐԵՎԱՆԻ ՇԻՆԱՐԱՐՈՒԹՅԱՆ ԵՎ ԲԱՐԵԿԱՐԳՄԱՆ
ԲՆԱԳԱՎԱՌՈՒՄ ԻՐԱԿԱՆԱՑՎԵԼ ԵՆ ՄՈՏ 12 ՄԼՆ ԱՄՆ ԴՈԼԱՐԻ ԱՇԽԱՏԱՆՔՆԵՐ
09-07-2007 15:55:00 | Հայաստան | Տնտեսություն
ԵՐԵՎԱՆ, 9 ՀՈՒԼԻՍԻ, ՆՈՅՅԱՆ ՏԱՊԱՆ: 2007թ.-ի առաջին
կիսամյակում Երեւանի շինարարության եւ բարեկարգման բնագավառում
իրականացվել են 4 մլրդ 249 մլն դրամի (մոտ 12 մլն ԱՄՆ դոլար)
աշխատանքներ: Ինչպես հուլիսի 9-ի ասուլիսում հայտնեց
քաղաքապետարանի Շինարարության, բարեկարգման եւ կոմունալ
տնտեսության վարչության պետ Ֆրունզ Բասենցյանը, արդեն ավարտվել են
երրորդ աստիճանի վթարայնության 3 շենքերի ամրացման աշխատանքները,
իսկ մինչեւ տարեվերջ կամրացվեն եւս 5 վթարային շենքեր:
Ըստ Ֆ.Բասենցյանի, այս ժամանակատվածում իրականացվել են 22
փողոցների արտաքին լուսավորության ցանցերի հիմնանորոգման, Սեբաստիա
փողոցի կապիտալ վերանորոգման, 315 հազ. քմ ասֆալտապատման, ինչպես
նաեւ Աջափնյակ համայնքի ոռոգման նոր ցանցի կառուցման աշխատանքները:
Նրա խոսքերով, մայրաքաղաքում մինչեւ տարեվերջ կիրականացվի եւս
105 հազ. քմ ասֆալտապատման, 4 փողոցների կապիտալ նորոգման, 5
ստորգետնյա եւ վերգետնյա անցումների կառուցման, ինչպես նաեւ
«Լամբադա» կամուրջի վերանորոգման աշխատանքներ: Նշվեց նաեւ, որ
սեպտեմբերին նախատեսվում է ավարտել Հանրապետության հրապարակի
շատրվանների վերանորոգումը: