ԸՍՏ ՀԱՆՐԱՅԻՆ ՌԱԴԻՈԸՆԿԵՐՈՒԹՅԱՆ ՏՆՕՐԵՆԻ, «ԱԶԱՏՈՒԹՅՈՒՆ»
ՌԱԴԻՈԿԱՅԱՆԻ ԵԹԵՐԻ ԺԱՄԱՆԱԿԱՎՈՐ ԽԱՓԱՆՄԱՆ ՊԱՏՃԱՌԸ ՏԵԽՆԻԿԱԿԱՆ ԽՈՏԱՆՆ
Է ԵՂԵԼ
23-02-2007 15:34:00 | Հայաստան | Հասարակություն
ԵՐԵՎԱՆ, 23 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 23-ին գրեթե
ամբողջությամբ խափանվել էլ «Ազատություն» ռադիոկայանի երեւանյան
խմբագրության պատրաստած առավոտվա լուրերի թողարկման հեռարձակումը:
Սակայն, ինչպես «ՆՈՅՅԱՆ ՏԱՊԱՆ»-ի թղթակցին հայտնեց ռադիոկայանի
երեւանյան բյուրոյի գլխավոր խմբագիր Արմեն Դուլյանը, կատարվածը
չպետք է դիտարկել որպես ռադիոկայանի հանդեպ իրականացվող ճնշողական
քաղաքականության դրսեւորում, քանի որ, նրա խոսքերով,
«Ազատությունը» ոչ ոքի համար «որեւէ վտանգ չի ներկայացնում»: Ըստ
Հանրային ռադիոընկերության տնօրեն Արմեն Ամիրյանի պարզաբանման,
եթերի խափանման պատճառը տեխնիկական խոտանն է եղել. վնասվել էր
ձայնային ազդանշանները հաղորդող մալուխը:
Միաժամանակ Ա.Դուլյանը չհերքեց «Հայկական ժամանակ» օրաթերթի
այն տեղեկությունը, թե 2005թ.-ի Սահմանադրական փոփոխությունների
նախաշեմին «Ազատությունը» հետեւողականորեն խլացվել է: «Հայկական
ժամանակ»-ի հրապարակումը եւ այսօրվա եթերի խափանման դեպքը նա
որակեց որպես «տարօրինակ զուգադիպություն»: Ա.Դուլյանի խոսքերով,
«միշտ էլ ընտրություններին նախորդող օրերին քաղաքական իրավիճակը
սրվում է»: