ՀԱՅԱՍՏԱՆՈՒՄ ԱՎԱՐՏՎԵԼ ԵՆ ՀՈՂԵՐԻ ՍԿԶԲՆԱԿԱՆ ՀԱՇՎԱՌՄԱՆ
ԱՇԽԱՏԱՆՔՆԵՐԸ
24-01-2007 19:41:00 | Հայաստան | Տնտեսություն
ԵՐԵՎԱՆ, 24 ՀՈՒՆՎԱՐԻ, ՆՈՅՅԱՆ ՏԱՊԱՆ: Հանրապետության բոլոր
համայնքների վարչական տարածքներում եւ դրանցից դուրս արդեն
ավարտվել են հողերի սկզբնական հաշվառման աշխատանքները, որոնց
ընթացքում ճշգրտվել է համայնքների հողային ֆոնդի առկայությունը`
ըստ նպատակային նշանակության, սեփականության սուբյեկտների եւ
հողատեսքերի: Կառավարության հաստատմանն է ներկայացվել
հանրապետության նոր պահանջներով կազմված հողային հաշվեկշիռը:
Վարչապետին Անշարժ գույքի կադաստրի պետական կոմիտեի հունվարի 23-ին
ներկայացրած հաշվետվության համաձայն, 2006թ.-ին ամբողջությամբ
ավարտվել են աշխատանքները գեոդեզիայի ոլորտում, որի արդյունքում ՀՀ
տարածքում ստեղծվել եւ ներդրվել է WGS-84 համաշխարհային
գեոդեզիական կոորդինատային համակարգում պլանային գեոդեզիական նոր
ցանցը:
2006թ.- շարունակվել են գույքահարկի հարկման բազաների
համալրման աշխատանքները, գնահատվել է շուրջ 71900 շենք եւ
շինություն: Ըստ կոմիտեի նախագահ Մանուկ Վարդանյանի, 2006թ.-ին
նախորդ տարվա համեմատությամբ փոփոխվել է անշարժ գույքի շուկայի
ակտիվության աշխարհագրությունը` տարեցտարի Երեւանի համեմատությամբ
առավել մեծ քանակով անշարժ գույքի գործարքներ են արձանագրվում
մարզերում:
Ավարտվել են Հայաստանի 916 համայնքների վարչական սահմաններում
գտնվող պետական սեփականության հողերն անհատույց սեփականության
իրավունքով համայնքներին փոխանցելու, ինչպես նաեւ համայնքների
վարչական սահմանների նկարագրման աշխատանքները, կառավարություն է
ներկայացվել 74 համայնքների հողերի օգտագործման ժամանակավոր սխեմա: