ԵՐԵՎԱՆ, 1 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ կրթության եւ գիտության նախարար Լեւոն Մկրտչյանը եւ Բուլղարիայի կրթության եւ գիտության նախարարի տեղակալ Կիրչո Աթանասովը նոյեմբերի 1-ին ստորագրել են երկու հանրապետությունների կառավարությունների միջեւ կրթության եւ գիտության բնագավառում 2007-2009 թվականների համագործակցության ծրագիր: Ծրագրով նախատեսվում է տեղեկատվության փոխանակում եւ գործնական ծրագրերի իրականացում: Կրթության ոլորտում դրանք կընդգրկեն միջնակարգ եւ բարձրագույն կրթական մակարդակները: Ընդ որում, նախատեսվում են փոխանակման ծրագրեր եւ սովորողների, եւ մասնագետների շրջանում: Գիտության ոլորտում նախատեսվում է ուղղակի կապերի հաստատում գիտահետազոտական ինստիտուտների միջեւ: Ըստ ՀՀ ԿԳՆ-ի լրատվական ծառայության հաղորդագրության, ծրագրում հատուկ տեղ է հատկացվում երկու երկրների համալսարաններում բուլղարերեն եւ հայերեն լեզուների ու մշակութային այլ առարկաների դասավանդմանը:

---