ԵՐԵՎԱՆ, 11 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: «Կիլիկիա» առագաստանավի անձնակազմին` գրող, հրապարակախոս Զորի Բալայանի գլխավորությամբ, մայիսի 11-ին ընդունել է ՀՀ ԱԳ նախարար Վարդան Օսկանյանը: Ինչպես «ՆՈՅՅԱՆ ՏԱՊԱՆ»-ին հայտնում են ՀՀ ԱԳՆ մամուլի եւ տեղեկատվության վարչությունից, ծավալված ջերմ զրույցի ընթացքում ծովագնացները ներկայացրել են նավարկության եզրափակիչ փուլի նախապատրաստական աշխատանքները` նշելով, որ դրանք ընթանում են նախատեսված ծրագրին համապատասխան: Նախարար Օսկանյանը հավաստիացրել է, որ արտգործնախարարությունը հնարավորինս կաջակցի նախապատրաստական աշխատանքների իրականացմանն ու նավարկության ընթացքում ծագող խնդիրների լուծմանը: Նա բարձր է գնահատել այդ արտասովոր նավարկության դերը եւ անձնակազմի խիզախությունն ու վճռականությունը` նշելով, որ դրանով «Կիլիկիան» յուրովի դարձել է Հայաստանի խորհրդանիշը: Վարդան Օսկանյանը նավաստիներին հաջողություն է մաղթել նավարկության վերջին փուլում:

---