«ՕՐԻՆԱՑ ԵՐԿԻՐ» ԿՈՒՍԱԿՑՈՒԹՅԱՆ ՆԱԽԱՁԵՌՆՈՒԹՅԱՄԲ ՀԻՄՆԱԴՐՎԵԼ Է
«ԱՎԵՏԻՔ ԻՍԱՀԱԿՅԱՆ» ՄՇԱԿՈՒԹԱՅԻՆ ԿԵՆՏՐՈՆԸ
04-04-2005 17:50:00 | Հայաստան | Մշակույթ
ԵՐԵՎԱՆ, 4 ԱՊՐԻԼԻ, ՆՈՅՅԱՆ ՏԱՊԱՆ: «Օրինաց երկիր»
կուսակցության նախաձեռնությամբ հիմնադրվել է «Ավետիք Իսահակյան»
մշակութային կենտրոնը, որի ղեկավարն է Վարպետի թոռը` իսահակյանագետ
Ավիկ Իսահակյանը: Միության շնորհանդեսին, որ կայացավ ապրիլի 2-ին
«Առնո Բաբաջանյան» համերգասրահում, «Օրինաց երկիր»-ի
պատասխանատուները հայտարարեցին, որ նորաստեղծ միությունը զբաղվելու
է երկրում կուտակված մշակութային հիմնախնդիրներով, աջակցելու է
մարզերի մշակութային կենտրոնների զարգացմանը, համագործակցելու է
Թեքեյան մշակութային միության եւ Համազգային հայ կրթական ու
մշակութային միության հայաստանյան գրասենյակի հետ, կազմակերպելու է
հանդիպումներ ու միջոցառումներ:
«Տեւական շրջան է ինչ կուսակցության ներսում գործում էր այս
միությունը, եւ որոշվեց այս շնորհանդեսով պաշտոնապես հայտարարել
նրա գոյությունը: Նորաստեղծ միությունը լուծելու է երկրում
կուտակված տարաբնույթ մշակութային խնդիրները»,- ընդգծեց «ՕԵ»
կուսակցության նախագահ Արթուր Բաղդասարյանը: