ՖԻԴԵԼ ԿԱՍՏՐՈ. ԿՈՒԲԱՆ ԱՄՆ-ԻՆ ՉՊԵՏՔ Է ԲԱՑԱՏՐՈՒԹՅՈՒՆ ՏԱ ԻՐ
ՏԱՐԱԾՔՈՒՄ ՌԴ ՕԴՈՒԺԻ ՀՆԱՐԱՎՈՐ ՏԵՂԱԿԱՅՄԱՆ ԱՌՆՉՈՒԹՅԱՄԲ
24-07-2008 18:55:00 | Կուբա | Միջազգային
ՀԱՎԱՆԱ, 24 ՀՈՒԼԻՍԻ, ՆՈՅՅԱՆ ՏԱՊԱՆ: Կուբան ոչ մի
բացատրություն չպետք է տա ԱՄՆ-ին իր տարածքում ռուսական
ռմբակոծիչների համար ռազմակայանների հնարավոր տեղակայման
առնչությամբ: Ինչպես հաղորդում է «Նովոստի» գործակալությունը, այս
հայտարարությամբ հանդես է եկել Կուբայի նախկին առաջնորդ Ֆիդել
Կաստրոն «Մաքիավելու ռազմավարություն» հոդվածում:
«Ռաուլը (Կաստրոն) ճիշտ վարվեց` արժանապատիվ լռություն
պահպանելով հուլիսի 21-ին ռուսական «Իզվեստիա» թերթում հոդվածի
հրապարակման առնչությամբ, որտեղ խոսվում է մեր տարածքում ռուսական
ռազմավարական ռմբակոծիչների համար ռազմակայանների հնարավոր
տեղաբաշխման մասին: Այդ տեղեկատվությունը հիմնված է հիպոթեզի վրա,
որ մշակվել է Ռուսաստանում այդ մեծ տերության անմիջական
հարեւանությամբ միջուկային վահանի արձակման կայանքների եւ
ռադարների տեղակայման գաղափարի իրականացման ամերիկյան համառության
առնչությամբ»,- գրում է Ֆիդել Կաստրոն:
«Պետք չէ դրա համար ներողություն խնդրել եւ բացատրություններ
տալ ԱՄՆ-ին»,- հայտարարել է Ֆիդել Կաստրոն:
Նախօրեին որոշ ռուսական ԶԼՄ-ներ հաղորդել են, որ իբր ռուսական
ռազմավարական Տու-160 եւ Տու-95ՄՍ հրթիռակիրներ են վայրէջք կատարել
Կուբայում, ինչպես նաեւ ծանոթացել Լատինական Ամերիկայի եւ Աֆրիկայի
պետությունների տեղակայման նոր օդանավակայանների ենթակառուցվածքին:
Հինգշաբթի ՌԴ ՊՆ բարձրաստիճան աղբյուրը այդ հաղորդումները հերքել
է` դրանք համարելով տեղեկատվական «խայծ»: