ԱՄՆ-Ը ԵՎՍ 170 ՀԱԶԱՐ ԴՈԼԱՐ ԿՏԱՄԱԴՐԻ ՀՀ ԻՐԱՎԱՊԱՀ ՄԱՐՄԻՆՆԵՐԻ
ԶԱՐԳԱՑՄԱՆ ՆՊԱՏԱԿՆԵՐԻՆ
24-09-2007 16:32:00 | Հայաստան | Հասարակություն
ԵՐԵՎԱՆ, 24 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 24-ին
Երեւանում ՀՀ գլխավոր դատախազ Աղվան Հովսեփյանը եւ ՀՀ-ում ԱՄՆ
գործերի ժամանակավոր հավատարմատար Ռուդոլֆ Փերինան ստորագրեցին
«Թմրադեղերի հսկողության եւ իրավապահ ոլորտում համագործակցության
մասին» հայ-ամերիկյան միջկառավարական նամակ-համաձայնագրի 6-րդ
արձանագրությունը: Փաստաթղթով հայկական կողմին կտրամադրվի շուրջ
170 հազար ԱՄՆ դոլարի ֆինանսական աջակցություն, ինչով նախատեսվում
է իրականացնել երկու ծրագիր ՀՀ ոստիկանության համար. հրաձգարանի
կառուցում եւ ներքին համակարգչային ցանցի ստեղծում: 2001թ. հունիսի
11-ին սկզբնական Համաձայնագրի ստորագրումից ի վեր Հայաստանի
իրավապահ մարմիններին տրամադրվել է շուրջ 8 մլն. դոլար գումար: Այդ
միջոցներով իրականացված աշխատանքների թվում են. ՀՀ ԳԱԱ առընթեր
անկախ փորձագիտական կենտրոնի եւ իրավապահ տարբեր մարմիններում
համակարգչային ուսումնական լսարանների ստեղծում, սահմանային կետերի
տեխնոլոգիական արդիականացում եւ այլն:
Ռ.Փերինան լրագրողներին հայտնեց իր երկրի պատրաստակամությունը
շարունակելու համագործակցությունը Հայաստանի իրավապահ մարմինների
հետ: Նա կարեւորեց երկկողմ, ինչպես նաեւ միջազգային ասպարեզում
իրավապահ մարմինների համագործակցությունը, հաշվի առնելով
միջազգային ահաբեկչության աճը: