Քննարկվել են սպորտային մարմնամարզության Եվրոպայի 2027 թվականի առաջնության նախապատրաստական աշխատանքները
01-10-2026 18:38 Հայաստան Հասարակություն
ՀՀ կրթության, գիտության, մշակույթի և սպորտի նախարար Ժաննա Անդրեասյանի նախագահությամբ տեղի է ունեցել սպորտային մարմնամարզության Եվրոպայի 2027 թվականի մեծահասակների առաջնության կազմակերպման և անցկացման միջգերատեսչական հանձնաժողովի հերթական նիստը։
Նիստին մասնակցել են ԿԳՄՍ նախարարության գլխավոր քարտուղար Հասմիկ Հակոբյանը, Սպորտի քաղաքականության վարչության պետ Նարինե Շահբազյանը, Հայաստանի մարմնամարզության ֆեդերացիայի նախագահ Գագիկ Վանոյանը, պետական և մարզական կառույցների ներկայացուցիչներ։
Քննարկվել են առաջնության նախապատրաստական աշխատանքները՝ ենթակառուցվածքների պատրաստության, մարզական գույքի և տեխնիկական միջոցների ապահովման, բժշկական սպասարկման, լուսաբանման և կազմակերպչական այլ աշխատանքների վերաբերյալ։
Անդրադարձ է կատարվել Ալբերտ Ազարյանի անվան նոր մարզադպրոցի կառուցման ընթացքին. կարևորվել է մարզադպրոցի՝ ժամանակակից պահանջներին համապատասխան կահավորումն ու անհրաժեշտ մարզական գույքով և սարքավորումներով ապահովումը։
Քննարկվել են նաև Կ. Դեմիրճյանի անվան մարզահամերգային համալիրում նախատեսվող աշխատանքները։
Նախարար Ժաննա Անդրեասյանն ընդգծել է աշխատանքները սահմանված ժամկետներում և պատշաճ որակով իրականացնելու, ներգրավված կառույցների գործողությունները համակարգելու անհրաժեշտությունը։
Նիստում անդրադարձ է կատարվել նոյեմբերի 18-21-ը Երևանում կայանալիք Եվրոպական մարմնամարզության ֆեդերացիայի տեխնիկական հանձնաժողովի նիստի կազմակերպմանը։ Տեխնիկական հանձնաժողովի այցի շրջանակում կարևորվել է Եվրոպայի 2027 թվականի առաջնության նախապատրաստական աշխատանքների ընթացքի ներկայացումը։
Նախնական տվյալներով՝ Եվրոպայի առաջնությանը սպասվում է շուրջ 35 երկրի 600-700 մասնակից՝ տղամարդկանց և կանանց մրցապայքարում։
Պատասխանատու կառույցներին հանձնարավել է սեղմ ժամկետներում հստակեցնել կազմակերպական բոլոր հարցերը, և աշխատանքները շարունակել համաձայնեցված ժամանակացույցով։
ՀԱՅԵՐԵՆ
