Դավիթ Թադևոսյանը և Չեռնոգորիայի զբոսաշրջության նախարարը քննարկել են ժամանակակից տեխնոլոգիաների՝ զբոսաշրջության ոլորտում կիրառման հնարավորությունները
24-09-2026 16:15 Հայաստան Մեկնաբանում է Վահե Գասպարյանը
Տառաչափ՝
Բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը Ֆեյսբուքի իր էջում լուսանկարներ է հրապարակել և կից գրել.
«Ընդունել եմ Չեռնոգորիայի զբոսաշրջության նախարար Սիմոնիդա Կորդիչի գլխավորած պատվիրակությանը։
Հանդիպման ընթացքում քննարկել ենք ժամանակակից տեխնոլոգիաների, թվայնացման և արհեստական բանականության՝ զբոսաշրջության ոլորտում կիրառման հնարավորությունները, ինչպես նաև երկու երկրների համապատասխան քաղաքականությունների և ռազմավարությունների զարգացման ուղղություններն ու փորձը։
Կարևորել եմ տեխնոլոգիական լուծումների դերը զբոսաշրջային ծառայությունների անհատականացման, այցելուների փորձառության բարելավման, զբոսաշրջային հոսքերի արդյունավետ կառավարման և ոլորտի ընդհանուր արդյունավետության բարձրացման գործում։ Անդրադարձել ենք նաև զբոսաշրջության թվայնացման գործընթացում առկա մարտահրավերներին։
Հանդիպման ընթացքում ներկայացրել եմ միջազգային տեխնոլոգիական միջոցառումների կազմակերպման Հայաստանի փորձը։ Մասնավորապես, անդրադարձել ենք «Seaside Startup Summit Armenia»-ի փորձին, որին այս տարի Չեռնոգորիան մասնակցել է բարձր մակարդակով։
Կարևորել ենք նման միջոցառումների նշանակությունը տեխնոլոգիական և զբոսաշրջային ոլորտների միջև համագործակցության խթանման, նորարարական գաղափարների փոխանակման և միջազգային կապերի ընդլայնման գործում։
Քննարկել ենք նաև փոխադարձ հետաքրքրություն ներկայացնող այլ հարցեր՝ երկկողմ համագործակցության ընդլայնման և համատեղ նախաձեռնությունների իրականացման հնարավորությունները»:
Բաժանորդագրվեք մեզ / Subscribe us on:/ Подписывайтесь
