Եվրոպական միությունը պատրաստ է աջակցելու Հայաստանին՝ Միությանն ավելի մերձենալու ճանապարհին. Մարթա Կոս
07-10-2026 13:08 Հայաստան Քաղաքականություն
Տառաչափ՝
Լսել նյութը🎙️ Անահիտ (AI)00:00 / 01:56
1lurer. Եվրահանձնաժողովի ընդլայնման հարցերով հանձնակատար Մարթա Կոսը Եվրախորհրդարանում կայացած ճեպազրույցի ընթացքում հայտարարել է, որ Եվրոպական միությունը պատրաստ է աջակցել Հայաստանին՝ քանի որ այն ավելի է մոտենում դաշինքին։
Կոսը նշել է, որ անդամակցության նախապատրաստման գործընթացին ԵՄ մոտեցումը կոչված է թեկնածու երկրներին հստակ ազդանշան տալու. Բրյուսելը պատրաստ է սեփական պարտավորություններով ամրապնդել նրանց առաջընթացը:
«Անդամակցության նախապատրաստական այս գործընթացի շրջանակում մենք չենք խոսում աջակցության հատուկ փաթեթների մասին։ Սա մեծ ճանապարհային քարտեզ է հենց Եվրոպական միության համար՝ նախապատրաստվելու և թեկնածու երկրներին ազդանշան տալու, որ մենք պատրաստ ենք, եթե նրանք հաղթահարեն, մենք էլ կհաղթահարենք»,- ասել է նա։
«Մենք աջակցում ենք նաև Հայաստանին»,- հավելել է Կոսը՝ նշելով, որ Հայաստանն ընդգրկված է իր պատասխանատվության ոլորտում՝ որպես Արևելյան գործընկերության հարցերով հանձնակատար։ «Երկիրն իսկապես շարժվում է դեպի Եվրոպական միություն»,- ասել է նա։
Կոսը կարևորել է Հայաստանի հետ ԵՄ համագործակցությունը վիզային ռեժիմի ազատականացման հարցում՝ նշելով, որ Հայաստանը ներկայումս միակ երկիրն է, որի հետ ԵՄ-ն բանակցում է նման գործընթացի շուրջ:
Նա նաև մատնանշել է ԵՄ-ի կողմից Հայաստանին ցուցաբերվող աջակցությունը առևտրի դիվերսիֆիկացման հարցում, հատկապես՝ Ռուսաստան հայկական արտադրանքի արտահանման սահմանափակումներից հետո։
«Մենք մեծ աջակցություն ենք ցուցաբերում, քանի որ Ռուսաստանն արգելել է ձեր երկրից ներմուծումը»,- ասել է Կոսը։
Նրա խոսքով՝ ԵՄ անդամ պետությունների և Եվրախորհրդարանի աջակցությամբ Միությունն ընդունել է առևտրային ինքնավար միջոցառումներ, որոնք թույլ են տալիս Հայաստանին իր արտադրանքի մոտ 80%-ն արտահանել ԵՄ՝ առանց մաքսատուրքերի։
Կոսը նաև նշել է Հայաստանի տնտեսական զարգացմանն ուղղված առանձին փաթեթի մասին։ «Եվ, իհարկե, գոյություն ունի հատուկ փաթեթ՝ երկրի տնտեսական զարգացման համար»,- ասել է Եվրահանձնաժողովի ընդլայնման հարցերով հանձնակատարը։
