Էկոնոմիկայի փոխնախարարը և Ֆրեզնոյի քաղաքապետը քննարկել են համագործակցության հնարավորությունները
01-10-2026 15:13 Հայաստան Տնտեսություն
Տառաչափ՝
ՀՀ էկոնոմիկայի նախարարի տեղակալ Տիգրան Գասպարյանը հոկտեմբերի 1-ին ընդունել է Ֆրեզնոյի քաղաքապետ Ջերի Դայերի գլխավորած պատվիրակությանը։ Պատվիրակության կազմում էին Ֆրեզնոյում ՀՀ պատվավոր հյուպատոս Պերճ Աբգարյանը, ինչպես նաև Ֆրեզնոյի քաղաքային խորհրդի մի շարք անդամներ:
Հանդիպման սկզբում Տիգրան Գասպարյանը ներկայացրել է Հայաստանի տնտեսության առաջնահերթությունները՝ արտահանման դիվերսիֆիկացում, արտադրողականության բարձրացում, ներդրումների ներգրավում և բարձր ավելացված արժեք ունեցող արտադրանքի արտահանման խթանում։
Այնուհետև քննարկվել են համագործակցության հնարավորությունները առևտրի և ներդրումների, ինտենսիվ գյուղատնտեսության, արդյունաբերական կլաստերների զարգացման, ինչպես նաև արտադրության ոլորտում ժամանակակից տեխնոլոգիաների կիրառման ուղղություններով։
Երկուստեք կարևորվել է փորձի փոխանակման և գործարար կապերի զարգացման նպատակով երկկողմ B2B հանդիպումների կազմակերպումը։
