Sputnik. ՀԱՊԿ-ում Հայաստանի քվեարկության իրավունքի հարցը կարող է քննարկվել նոյեմբերի 11-ի կայանալիք գագաթնաժողովում։
ՀԱՊԿ մարմիններում Հայաստանին ձայնի իրավունքից հնարավոր զրկելու մասին որոշում կարող է կայացվել միայն կազմակերպության անդամ պետությունների կոնսենսուսի միջոցով։ Այս մասին ՌԻԱ Նովոստիին ասել է ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը։
«ՀԱՊԿ Հավաքական անվտանգության խորհրդի հաջորդ նստաշրջանը կկայանա Մոսկվայում նոյեմբերի 11-ին, և պետությունների առաջնորդները, հավանաբար, կքննարկեն այս հարցը։ Անհրաժեշտության դեպքում դրա վերաբերյալ որոշումը կկայացվի կոնսենսուսի միջոցով», – ասել է Վասիլևը։
ՌԴ մշտական ներկայացուցիչը պարզաբանել է, որ ՀԱՊԿ կանոնադրության 25-րդ հոդվածը նախատեսում է պետության՝ կազմակերպության մարմիններում քվոտային պաշտոններում իր քաղաքացիներին առաջադրելու իրավունքը, ինչպես նաև ձայնի իրավունքը կասեցնելու հնարավորություն, եթե երկիրը երկու տարուց ավելի չի կատարում ՀԱՊԿ բյուջե անդամավճարի հետ կապված իր պարտավորությունները։
Վասիլևի խոսքով՝ փաստացի նման իրավիճակ արդեն իսկ ստեղծվել է։
«Դե ֆակտո, նման իրավիճակ է արդեն ավելի քան երկու տարի, քանի որ Հայաստանը չի առաջադրում իր քաղաքացիներին քարտուղարության քվոտաներով պաշտոններին, ինչպես նաև հետ է կանչել իր ներկայացուցիչներին ՀԱՊԿ-ի միացյալ շտաբից», – նշել է նա։
Հայաստանը ՀԱՊԿ-ին իր մասնակցության «սառեցման» մասին հայտարարեց 2024 թվականի փետրվարին։ Վարչապետ Նիկոլ Փաշինյանը դա բացատրեց նրանով, որ, Երևանի կարծիքով, 2021-2022 թվականներին դաշնակիցները չեն կատարել Հավաքական անվտանգության մասին պայմանագրով իրենց պարտավորությունները Հայաստանի նկատմամբ։
Հունիսին ՌԴ արտգործնախարար Սերգեյ Լավրովը հայտարարել էր, որ ՀԱՊԿ-ին Հայաստանի կողմից անդամակցության վճարը չվճարելու պատճառով կազմակերպությունը կքննարկի կանոնադրության այն հոդվածի կիրառումը, որը կարգավորում է պարտավորությունները չկատարող պետությունների նկատմամբ սահմանվող միջոցները։
ՀԱՊԿ անդամ են Ռուսաստանը, Բելառուսը, Հայաստանը, Ղազախստանը, Ղրղզստանը և Տաջիկստանը։
ՀԱՅԵՐԵՆ
